دهما ئهم چیرۆکا ئهنفالێ دگێرین تهنێ سالا ( 1988 )ێ تێته پێش چاڤێن مرۆڤی لێ، د ڤێ نڤێسینێ دا ئهزێ ئاماژێ ب ناڤهرۆکا ئهنفالێن رهش نهکهم. کو د ( 8 ) قوناغاندا و پشتی 23-02-1988 ههتا 06-09-1988ێ وهک پرانیا مه دزانن،ب چ ئهنجامێن گران و تراژیدیک و قرکرن و جینوسایدکرنا گهلێ کورد ب مرۆڤ و ئاخ و ههواو خوهزایا وێ ڤه،کهفتینه بهر مهسترین ئۆپهراسیۆن و شالاوێن دۆریندهترین رژێما وێ سهردهمێ یا سهدامێ گۆربهگۆر و دارودهستهکێن وی کو چ بۆمبه و چهک نهمابوون ل سهر نهتهوامه تاقی نهکرین.
ههلبهت ئارمانجا من ژ ڤی نڤێسینێ ئهوه هندهک خالێن ڤهشارتی کو کێم ئاماژه پێ هاتیه کرن، بێخمه بهرچاڤین خوهندهڤانان.باش تێته بیرا من ل رۆژا-03-09-1988ێ. ئهم گههشتینه سنوورێ باشوور و باکورێ کوردستانێ ل گوندێن شیڤرهزان،ئهلهمۆن،گهرهمۆس،و ئارووشێ، بۆ ماوێ چهند رۆژهکان ئهم ل ڤان گوندا ماین. پشتی گهلهک دانوستاندن و گهنگهشهیان،کو دناڤبهرا بهرپرسیارێن مه و رایهدارێن تورکیا دا چێ بووین چاره نڤێسێ مه هێدی هێدی دیار بوو.چونکه ئهم هاتینه ئاگههدارکرن کو خهلکێ مه یێ ژ ئهنفالا دهڤهرا بههدینان رزگار بووین ژ ماراوان نێزیکی ( 80 )ێ ههزاران د بیت، و ژ بهرهندێ حکومهتا تورک نهچاره وهک پهنابهر وهربگریت و ل هندهک کهمپاندا ئاکنجی بکهت.پشتی ئهڤ مزگینی گههشتیه مه دلێ مه ئارام بوو لێ ئهم ههر ب گومان بوون،و د دهمهکا کورت دا ئهم هاتینه ئاگههدارکرن کو دێ مه بهنه باژێرێ ئامهدێ و ئامهد ب کهلها وهلات پارێز و کوردپهروهران ب ناڤ و دهنگه، ژ بهرڤێ چهندێ ئهم گهلهک کهیفخۆش بووین،و ل رۆژا 14-09-1988 ێ کو ههژمارا مه نێزیکی ( 4000 ) ههزار کهسان د بوو مه بهرێ خۆ دا دهڤهرا بهستا ل گوندێ ئاشووتێ و پشتی شهڤهک و رۆژهکان، ل وێرێ ژی ئهم ل قامیۆنا هاتینه سوارکرن و بۆ گهلیێ تیارێ برێکهفتین،پشتی دهمهکا درێژ د نیڤا شهڤهکا تاریدا. ل دهنگێ دووریشم و سلۆگانێن کوردپهروهران مهزانی ئهڤه باژێرێ باشکالا باکورێ کوردستانێ یه! دخوازن دهستێ هاریکاریێ بۆ مه درێژ کهن لێ هێزێن تورک ناهێلن.
بێگومان د وێ دهمێ دا مهنیازێن هێز و حکومهتا تورک زانین کو ئهو مه نابهن دا ژیانا مه ژ مهترسیێ رزگارکهن، بهلکو مه ژ بۆ چارهنڤێسهکێ رهش و بهرزه دبهن، و ئهڤا ب رژێما بهعسا گۆربهگۆر نههاتی کرن،دێ برایێن وان یێن تورک ب جهکهن.لێ سهرهرایی رێگرتنا جهلاد و مرۆڤ کوژێن تورک برایێن مه یێن باشکالهیی دهستێ هاریکاریێ بۆ مه درێشکر و د شانهشینێن مالێن خۆ دا قامیۆنێن مه خوارنبارانکرن.پشتی دهمهکا درێش یا رێکێ د ئهلندا رۆژێ دا چاڤێن مه ب گۆلا وانێ و چیایێن سیپان و خهلاتێن خهج و سیابهندی کهفتن.و ب درێژاهیا رۆژێ بێی راوستان د ئێڤاریهکا گهرمدا کاروانێ مه.ل رۆژا 16-09- 1988 گههشته کهمپا ئامهدێ و رایهدارێن تورک گوت ئهڤ چادرگههه دێ بیته جهێ ژیانا ههوه و ههر چادرهکێ ژی دڤێت ( 10 ) کهس تێدا بژین. و دێ ئهڤه جهێ ژیانا ههوه یا بهردهوامبیت. ب ڤێ قۆناغێ بۆ مه ب رۆهنی دیار بوو کو ئهم نه بۆ پاراستنا ژیانا مه ئیناینه ڤێرێ بهلکو بهرۆڤاژی بۆ مرنێ ئهم کرینه دڤێ دۆزهخیدا و ژ نهچاری ئهڤ رهوشا ب دۆمان و تێل بهندکری و پێچای ب جهندۆرمهیان مه پهسهندکر.وهک چهوا ل پێشیا مه ژی نێزیکی ( 10 ) ههزار کهسێن ژ دهڤهرا زاخو د چادرگههێدا ب ههمان ئاوای ب جهکربوون،و وهک وان بۆ مه دایه دیارکرن کو گهلهک زارۆک و کهسێن ناڤ سال د چادرگههیدا، ژیانا خۆ ژ هندهک ئهگهرێن نهدیار ژ دهستدایه،لێ مه گوت دبیت ژ ئهگهرێ باندۆرا کێمیابارانێ بیت،و گهلهک ب گرنگی کار ل سهر نههاتهکرن،ههتا کو ئهگهرا وێ بۆ مه دیاربووی کو دهستێ مخابرات و ئهمن و نوکهرێن رژێما سهدامی و ههڤپهیمانێن وان یێن تورک، ب بهرنامهکی دارشتی دهستێن خۆ تێکخستینه کو ب گهلهک رێکان مه ژ ناڤ ببهن.
سیخوران ل سهر ناڤێ نهخۆشیێن تیفۆ مهلاری و ب گشتی هندهک کارمهندێن میتێ کو بۆ مخابراتا سهدامی کاردکرن،وهک لیژنا ساخلهمیێ چادر ب چادر دگهرهان و ههر دانهکی رۆژێ ( 14 ) حهبک ب زۆری ب مه د دانهخوارن،و پشتی خوارنا ڤان حهبکان ب چهند رۆژهکان مه دوو شههید دان کو ئهوژی ئهڤهبوون جهمیل تهها کێستهیی،و فادل بابیری،پشتی شههیدبوونا وان کو ئهم ژ ئالیێ پزیشکێن پسپۆر ڤه کو ئهوژی برایێن مه یێن کورد بوون،ژ وهلات پاریز و تێکۆشهرێن کهلا ئامهدێ ڤه هاتینه ئاگههدارکرن کو ئهم هاتینه ژههرخواردکرن.و ئهگهر رێ ل ڤێ چهندێ نههێته گرتن دبیت ببیته کارهساتهکا مهزن و، رۆژانه ب دههان کهس ژیانا خۆ ژ دهست بدهن.و ژ بلی بێ ئالاتریک و خوهشیشتن و خوارنهکا ساخلهم و کهرستهیێن نڤستنا شهڤێ، ئهڤاهه ههر ههمۆ بۆ مه خهون بوو.لێ دڤێت نههێته ژبیرکرن و ئاماژێ ب رۆلێ گرنگێ کوردپهروهرێن باکورێ کوردستانێ ب گشتی و باژێرێ ئامهدێ ب تایبهتی بدهم کو رۆژانه ب دههان قامیۆنێن خوارن ڤهخوارن ناڤمالی بۆ مه تینان. لێ تهنێ مه ل بهر دهرگههی ژ دۆرڤه تهماشهدکرن. و رایهدارێن تورک د گوته وان ئهم دێ پاشی ب سهر پهنابهران دا بهلاڤکهین لێ راستی وهسا نهبوو چونکه د پشترا بۆ لهشکهرێ خۆ دبرن.لێ ههر ئامهدی بێ ههولدان نهمان و گهلهک پێشنیاز دانه پارێزگارێ باژێری دا کو رهوشا مه باش بکهن، یهک: ژ وان پێشنیازان ئهڤه بۆ دڤێت هوون رێکێ بدهنه مه ههرمالباتهکا پهنابهر ئهم دناڤ مالباتێن خۆ دا خۆدانکهین ،دوو: ئهگهر نه دڤێت ژ چادرگههێ ببنه ناڤ خانیان سێ: دڤێت رێکێ بدهنه مه دا ئهم هاریکاریین خۆ ب سهردا بهلاڤکهین،چار :دڤێت هوون رێکێ ل وان نهگرن دا ب ئازادی هاتن و چۆنا ناڤ باژێرێ ئامهدێ بکهن و د ههماندهمدا ب خۆ کاربکهن.خالا ئێکێ پێک نههات لێ پشتی رهنج و بزاڤا ئامهدیان ههرسێ خالێن دی ل گهل کێماسیێن خوه پێکهاتن.
ههلبهت بهرپرسێن مه ژی د ڤی چارچۆڤهیدا درێکخستی بوون، و رۆژانه پهیوهندی دگهل سهرۆکاتیا پارتیا دهموکراتا کوردستانێ و ب تایبهتی جهنابێ سهرۆک مهسعود بارزانی، دکرن و دجڤین و کۆمبوونێن دگهل پهنابهران دا د گوت سلاڤێن سهرۆکاتیا مه و مهکتهبا سیاسیا پارتیا دهموکراتا کوردستانێ و بهرهیێ کوردستانی بۆ ههوه ههنه. و ژ نێزیک ڤه ئاگههدارێن رهوشا مه نه،و گوتیه بهرخوهدانا ههوه کێمتر نینه ژ پێشمهرگاتی و ههڤالێن مه یێن د زندانێن داگیرکهران دا ب سهربلندی ل بهرخوه ددهن،و ههرکهسێ نورمال ژی ژیانا خۆ ژ دهست بدهت،ب بریارهکا فهرمی یا بهرهیێ کوردستانی تێته ههژمارتن ژ رێزێن شههیدان!! لێ خالا کو ئهز دخوازم ئاماژێ پێ بکهم و کاکلکا ڤێ نڤێسینێ ئهڤهیه، ئهز بانگی وان بهرپرسان دکهم کو نوکه ژی ژ بلی چهندهکان کو یێن گههشتینه کاروانێ نهمران. پرانیا وان خۆدانێن پۆستێن بلندێن ئیداری و سیاسی نه ل دهڤهرا دهوکێ، دهما د کهمپێ دا ئهڤ گوتنه د گوتن گهلۆ هوون دزانن ئهڤه زێدهی ( 20 ) سالان ب سهر کارهساتا جهرگبرا ئهنفالان دا دهرباسبوون و هێشتا ئهو خهلک تێته ئهنفالکرن؟و برینێن وان نههاتنه دهرمانکرن؟ گهلۆ هوون دزان گۆرهکا ب کۆم یا ئهنفالکریان ل ئامهدێ یه ژی تهنێ ل بیابانێن ژێریا عێراقێ ب تهنێ نینن؟گهلۆ وه ل بهره هوون رۆفاتێن وان ( 500 )ئهنفالکریێن ل ئامهدێ ژی ب رێورهسمهکا ژ ههژی و خهملاندنا تهرمێن وان یێن پیرۆز ب ئالایێ رهنگین بۆ کوردستانا ئازاد بینن؟گهلۆ ههوه جارهکێ گوهداریا چیرۆکێن پهنابهرێن کهمپێن ئامهد،مێردین،مووش،گهڤهر،و سلووپیا کریه؟ ئهگهر هوون بێژن ئهڤه نێزیکی ( 22 ) سالانه ب سهر وێ کارهساتێ دا دهربازبوویه و ژ بیرا مه چوویه، ژ کهرهما خۆ ههرنه گوندێ چهلکێ و بێژنه حهجی شهریفێ چهلکی چهوا بۆ دهما ( 4 ) کۆرێن ته ژ بلی پسمام و کهس و کاران ل گوندێ کورێمێ،جهلادێن سهدامی ل پێش چاڤێن ته گولهبارانکرن؟یان ژی ههرنه دهف سترانبێژ نایف کهشانی بێژنێ رۆژانه تۆ کیش سترانا خۆ دبێژی کا دێ بێته ههوه سترانا ئهنفالان یان نه؟ یان ژی ههرنه دهف تێکۆشهر ئهیوب برجینی بێژنێ بۆچی گوندێ برجینێ نه هاتیه ئاڤهدانکرن،کا دێ بێته ههوه مانه برجین یا هاتیه کێمیابارنکر و ژ بهر باندۆرا کێمیاوی ناهێته ئاڤهدانکرن؟
لێ بێگومان ئهز دزانم هوون دێ بێنه من ب بوره،ژ بهر ئاڤاکرنا کۆچک و تهلار و کۆمپانی و کارێن خوهیێن بازرگانی ئهم نکارین ئهڤا تۆ دبێژی پێکبینن،و پرانیا وان کهسان ل گوندان دژین و پێتڤی ناکهت سهرهدانا وان بکهین.لێ ئهز ژی دێ بێژم هندی ئێکێ خهبات و تێکۆشین کری و کهفتیه بهر شالاوێن ئهنفالێن رهش. د خانیێن ئاخێدا بژیت،و ژ ههموو مافێن خوهیێن مرۆڤاتی بێباهربیت،ئهنفال کرن ژی یا بهردهوامه!
